howlytown.in

 

১৯৬৬ চনতে গঠিত হোৱা "হাউলী ক্ৰীড়া সন্থা"ই হাউলী অঞ্চলৰ বহুতো ক্ৰীড়া প্ৰতিভাক খেলৰ ক্ষেত্ৰত আগুৱাই নিয়াত সহায় কৰি আহিছে। ২০১৬ চনৰ ১২ আৰু ১৩ মাৰ্চত "হাউলী ক্ৰীড়া সন্থা"ই সোণালী জয়ন্তী বৰ্ষ অতিক্ৰম কৰিছে। "হাউলী ক্ৰীড়া সন্থাৰ উদ্যোগত প্ৰয়াত ৰমাকান্ত দাস, প্ৰয়াত বিশ্বনাথ দাস, প্ৰয়াত ডা: সুৰেন্দ্ৰ নাথ দাস সোঁৱৰণী ফুটবল শ্বিল্ড প্ৰতিযোগিতা, ইন্দু হাজৰিকা সোঁৱৰণী আন্ত:ৰাজ্যিক ফুটবল প্ৰতিযোগিতা, মুলচান্দ মালু সোঁৱৰণী ফুটবল প্ৰতিযোগিতা, সুনীল কলিতা সোঁৱৰণী ফুটবল প্ৰতিযোগিতা, ৰাতুল দাস আৰু আদ্য দাস সোঁৱৰণী ফুটবল আদি প্ৰতিযোগিতা অনুষ্ঠিত হৈছে।

 

The Howli Sports Association, formed in 1966, has been helping many sports Talents in the Howli region take the lead in sports. The "Howli Sports Association" has crossed the Golden Jubilee Year on March 12 and 13, 2016.

"The initiative of Howly Sports Association has organized competitions like late Ramakant Das, late Vishwanath Das, late Dr. Surendra Nath Das Memorial Football Shield Competition, Indu Hazarika Memorial Inter-State Football Competition, Mulchand Malu Memorial Football Tournament, Sunil Kalita Memorial Football Tournament, Ratul Das and Adya Das Memorial Football, etc.

হাউলীৰ আটাইতকৈ পুৰণি বীৰনাম দলৰ কিছু কথা

অসীম দাস

ধার্মিক হ'বলৈ পণ্ডিত হ'ব নালাগে, লাগে কেৱল ঈশ্বৰত বিশ্বাস। মানুহে সংসাৰৰ দুখ কষ্টত পৰি উদ্ধাৰ পাবলৈ ভগবানৰ আশ্রয় লয়। কোৱা হয় যেন বিধ ভক্তিৰ (শ্ৰৱণ, কীৰ্ত্তন,স্মৰণ, অর্চন, পাদসেৱন, বন্দন, দাস্য, সখিত্ব আৰু আত্মনিবেদন) ভিতৰত শ্ৰৱণ-কীৰ্ত্তন সবাতোকৈ
শ্রেষ্ঠ। নামৰ মাজেৰে ঈশ্বৰক পাবলৈ কৰা প্ৰয়াস এক সহজ পদ্ধতি। নাম-কীৰ্ত্তনৰ অৰ্থ হৈছে কৃষ্ণৰ
নাম, কীৰ্ত্তি বা গুণ বর্ণনা কৰা কাৰ্য। বীৰনাম বা থিয়নাম হ'ল বিভিন্ন অংগী- ভংগীৰে সমূহীয়া তথা সংবদ্ধ হৈ হস্তপাদ সঞ্চালন কৰি নাম গোৱা পদ্ধতি। এই নামত ভোৰতাল, খুতিতাল, নাগাৰা আদি বাদ্য বজোৱা হয়। অর্দ্ধ বৃত্তাকাৰে থিয় হৈ তাল ছন্দেৰে এই বীৰনাম বা থিয়নাম প্ৰদৰ্শন কৰা হয়। নামদলটোত এজন পাঠক থাকে। তেওঁ নাম লগাই দিয়ে আৰু বাকী বাপসকলে তাল, নাগাৰা আদি বাদ্যযন্ত্র সংগত কৰাৰ লগতে হাত চাপৰিৰে সংগ দি পাঠকক অনুকৰণ কৰে।

 

হাউলী অঞ্চলৰ প্রায় প্রতিখন গাঁওতেই নামদল আছে। হাউলী অঞ্চলৰ ভিতৰত আটাইতকৈ পুৰণি নামদলৰ ভিতৰত এটা হৈছে "হাউলীগাঁও" নামদল। অৱশ্যে এই নামদলৰ আৰম্ভণীৰ চন আৰু তাৰিখ সঠিককৈ কোৱা টান। হাউলী গাঁৱৰ এগৰাকী বয়োজেষ্ঠ ব্যক্তি হ'ল পদ্মৰাম নাথ। তেখেতৰ বৰ্তমান বয়স প্রায় ৯৫ বছৰ। "হাউলী গাঁও" নামদলৰ জন্মলগ্নৰে পৰা জড়িত আছিল তেখেত। তেখেতৰ বয়স সেই সময়ত ১২-১৪ বছৰ মান হ'ব। ঘৰে ঘৰে ধান তুলি, অর্থ সংগ্ৰহ কৰি নামদল জন্ম দিয়াৰ অভিজ্ঞতাৰ কথা তেখেতৰ লগত হোৱা সাক্ষাৎকাৰৰ পৰা জানিব পাৰিছিলো। পদ্মৰাম নাথৰ বৰ্তমান বয়সৰ লগত তেখেতৰ ডেকা কালৰ নামদলৰ অভিজ্ঞতাৰ তুলনা কৰি স্পষ্টকৈ অনুমান কৰিব পাৰি যে "হাউলী গাঁও নামদল"টো প্রায় ৮০ বছৰ পুৰণি নামদল। 

হাউলী অঞ্চলৰ কিছু পুৰণি কথা আৰু হাউলী গাঁও নামদলৰ লগত তেখেতৰ অভিজ্ঞতাৰ বিষয়ে পদ্মৰাম নাথৰ লগত হোৱা সাক্ষাৎকাৰ- 
প্রশ্নঃ পুৰণি হাউলীখন তেতিয়া কেনেকুৱা আছিল? 
উত্তৰ: কেউদিশে জংঘল। চন মাটি। ওখ-ওখ কেঁতুৰি-হালধিৰে ভৰি আছিল হাউলী গাঁৱৰ অঞ্চল। মানুহবো বসতি কম। কেইঘৰমান মানুহে খেতি কৰিছিল পথাৰত। গধূলি হ'লেই শিয়ালবোৰে হোৱা দিবলৈ ধৰে। মৰা মানাহ নদীৰ পাৰে পাৰে থকা জংঘলবোৰৰ পৰা ভাঁহি আহে শিয়ালৰ মাতবোৰ। বাঘো আছিল সেইসময়ত হাউলীত। প্রশ্ন: আপুনি বাঘ দেখিছিল নে?

উত্তৰঃ দেখিছোঁ। গোহালিৰ বেৰ ভাঙি গৰু টানি উলিয়াই নিছিল বাঘে।

 

প্রশ্ন: বাঘ খেদিব পৰা উপায় কি আছিল?

উত্তৰঃ বাঘক কেনেকৈ খেদিবি বোপা,। কিছুমান কথাৰ পৰা বাঘ থকা-নথকাৰ উমান পাইছিলোঁ। পথাৰত গৰু-ম'হ নেদেখিলে বাঘ অহাৰ উমান পাইছিলোঁ। সেই সময়ত বাঘ আদিৰ দৰে হিংস্র জন্তুৰ পৰা নিৰাপদে থাকিবলৈ পথাৰত টঙি সাজিছিল। চাৰিটা বাঁহৰ খুটি পুতি ওখকে এখন চাং তৈয়াৰ কৰি মানুহে ওপৰত থাকিছিল। ওপৰত খেৰেৰে চালি দিয়া হৈছিল। এদিন ৰাতিৰ কথা। শিয়ালবোৰে চিঞৰিবলৈ ধৰাত মানুহজনে চাংখনৰ তলত বাঘ অহাৰ উমান পাইছিল। সাৰ পাই বিবুদ্ধিত পৰি লোকজনে সাহস গোটাই খাপাৰ (ডাঙৰ দা) খন জুইত গৰম হ'বলৈ দিছিল। ঈশ্বৰৰ নাম লৈ মানুহজনে দা খন লৈ ৰাতি পুৱাবলৈ অপেক্ষা কৰি আছিল। কিন্তু বাঘটোক তলেৰে যোৱা দেখি একে ঘাপে দাখন বাঘৰ সোমাই দি বাঘটো মাৰিছিল।

 

প্রশ্ন: হাউলী গাঁও অঞ্চলত আপুনি মনত পৰা মতে মাটিৰ মূল্য কিমান আছিল সেই সময়ত? 

উত্তৰ: সেই সময়ত হাউলী গাঁওত মাটিৰ দাম আছিল বিঘাই ২২৫ টকা। মাটিবোৰ জংঘলেবে ভৰি থকা বাবে বস্তি বা খেতি কৰিবলৈ মুকলি কৰি ল'বলৈ বৰ কষ্টকৰ আছিল। ট্রেক্টৰো নাছিল সেই সময়ত। কোৰ মাৰি এদিনত অলপ ঠাইহে মুকলি কৰি ল'ব পৰা গৈছিল। মাটিৰ মূল্য কম হ'লেও সেই মাটিয়ে মানুহৰ বিশেষ মুনাফা দিব পৰা নাছিল। আমি থকা এই ঘৰ বস্তিটোও সেই সময়তে জংঘল কাটি মুকলি কৰা হৈছিল। সেই সময়ত ম'হবোৰেও খেতি নষ্ট কৰি মানুহৰ অপকাৰ কৰিছিল। বিশেষকৈ বাৰিষা কালত হাউলী অঞ্চলত ম'হবোৰৰ উৎপাত বেছি হৈছিল। বৰপেটাত সেই সময়ত বহুতো ম'হৰ বাথান আছিল। বৰপেটা অঞ্চল দ হোৱা বাবে বাৰিষা ঘাঁহনিবোৰ পানীৰে ডুবি থকা বাবে ম'হবোৰ উত্তৰে ওখ ঠাই বিচাৰি হাউলী অঞ্চললৈ ঘাঁহ খাবলৈ গুচি আহিছিল। ম'হে সেই সময়ত মানুহো মাৰিছিল। পাছত মৌজাদাৰক আপত্তি কৰাত দুটামান ম'হ গুলিয়াইও মৰা হৈছিল হাউলীত।

 

প্রশ্ন: বৈঠকীত কি হৈছিল? আপুনি নাটকত অভিনয় কৰিছিলনে?

উত্তৰঃ বৈঠকী হৈছে সংগীতৰ অনুষ্ঠান। আগতে বিয়াবোৰত বৈঠকী প্রায়ে হৈছিল। বৈঠকী গোৱা কিছুমান দল আছিল। অৱশ্যে বৈঠকী দলে গীত পৰিবেশন কৰাৰ বাবদ গৃহস্থৰ পৰা কোনো মাননি লোৱা নাছিল। বৈঠকীত পালাপালিকৈ গোৱা হৈছিল। বৈঠকীত বিভিন্ন গীত-মাত গোৱা হৈছিল। লোকগীত, বৰগীত, পুৰণি গীত আদি গাইছিল বৈঠকীত।
মই নাটকত অভিনয় কৰিছিলো। অকল হাউলীতে নহয়, নাটক কৰিবলৈ আমি হাউলীৰ বাহিৰলৈও বহুবাৰ গৈছিলোঁ। ৰঙাপানীলৈও এবাৰ যোৱা মনত আছে। হাউলীৰ আশে-পাশে থকা অঞ্চলসমূহতো আমি নাটক কৰিছিলো।

 

প্রশ্ন: আপুনি সৰুকালত বৃটিছসকলক দেখিছিলনে?

 উত্তৰঃ অ। আমি সৰু থাকোঁতে অসমত বৃটিছ শাসন আছিল। বৃটিছ পুলিচবোৰক দেখা মনত পৰে মোৰ। মূৰত দীঘল ৰঙা টুপি পিন্ধিছিল। অৱশ্যে ৰাস্তাৰে পুলিচ অহা শুনিলেই ভয়তে আমি দৌৰি পলাইছিলো।

 

প্রশ্ন: হাউলী গাঁওত বীৰ নামদল কিদৰে আৰম্ভ হৈছিল?

উত্তৰঃ ঘৰে ঘৰে ধান তুলিবলৈ গৈছিলো আমি। নামদল খুলিবলৈ আমাক তাল আৰু নাগাৰাৰ প্রয়োজন আছিল। কিনিবলৈ অৰ্থৰ অভাৱ হোৱা হেতুকে ঘৰে ঘৰে ধান তুলিবলৈ গৈছিলো। বহু কষ্ট কৰিবলগা হৈছিল বোপা নামদল খোলাৰ কাৰণে।

 

প্রশ্ন: আপোনালোকৰ নামদলৰ প্ৰথমজন পাঠক কোন আছিল?

উত্তৰঃ "মহলাৰাম নাথ। তেখেতৰ পাছত পাঠকৰ দায়িত্ব লৈছিল "হলিৰাম নাথে। আমি তেওঁৰ হাক- বচন বৰকে মানি চলিছিলো। ভয়ো কৰিছিলো তেখেতক। নাম আমি তেওঁৰ পৰাই শিকিছিলো। আমি মনোযোগ নিদিলে কেতিয়াবা ধমক্ দিছিল আমাক তেখেতে। "হলিৰাম নাথৰ পাছত মোৰ দাদা প্রহ্লাদ নাথে বহু বছৰৰ বাবে হাউলী গাঁও নামদলটোৰ পাঠকৰ ভাৰ লৈছিল।

 

প্রশ্ন: নাম দলটোৰ লগত জড়িত সেইসময়ৰ ব্যক্তিসকলৰ নাম কওঁকচোন।

উত্তৰঃ মনত নাথাকে মোৰ আজিকালি। কথাবোর পাহৰি যাওঁ বোপা। তথাপি মনত পৰা কেইজনমানৰ নাম কৈছো-মহলাৰাম নাথ, "ৰবি নাথ, (তাল), প্রহ্লাদ নাথ, তনু নাথ, ৰাজিন নাথ, যোগেন নাথ, মথুৰা নাথ, ইন্দ্রমোহন নাথ, মনো নাথ, শুভে নাথ, নৰেন নাথ,"ভবিন্দ্র নাথ, *ৰামপদ নাথ, ধনা নাম, ললিত নাথ, গিৰিশ নাথ, "মাণিক নাথ, মহিনী নাথ, কৰুণা নাথ, বীবেন নাথ, বিজয় নাথ, ডুম্বৰুধৰ নাথ আদি।

 

প্রশ্ন: হাউলী গাঁৱৰ নাম দলটোবে হাউলীৰ বাহিৰত নাম পৰিবেশন কৰিব গৈছিল নে?

উত্তৰঃ হয়, গৈছিলো বহুবাৰ। ভৱানীপুৰ, ভালাগুৰী, বৰপেটা আদিৰ দৰে হাউলীৰ আশে- পাশে থকা ঠাইবোৰলৈ মাতিছিল আমাক। বৰপেটা জিলাৰ বাহিৰলৈও আমি গৈছিলো। গাঁৱৰ ডেকাসকলে এতিয়া আমাৰ মন্টু নাথৰ নেতৃত্বত অসমৰ ইমূৰৰ পৰা সিমূৰলৈ নাম পৰিৱেশন কৰিছে। গুৱাহাটী, বঙাইগাঁও, গোৱালপাৰাৰ উপৰি ৰহা, নগাঁও আদিৰ দৰে উজনিৰ বিভিন্ন জিলালৈ আমাৰ গাঁৱৰ নাম দলটোৱে নাম পৰিবেশন কৰিবলৈ যায়। ভাবি ভাল লাগে। সৰুতে কষ্টেৰে গঢ় দিয়া নামদলটোৰ কথা শুনিলে মনত সুখ পাওঁ। এই নাম দলটোৰ আৰু উন্নতি হওঁক। ভগৱানে ডেকাসকলক শক্তি দিয়ক, কৃপা কৰক।